UPDATE
WILLEMSTAD.- Posishon di partidonan di koalishon ta, ku no tin base pa kore ku hefe di Ontvanger, Afonso Trona. Manera e rapòrt di ofisina di akountent SOAB mes ta bisa, ta keda na diskreshon di e hefe pa entre otro duna “voorschot” riba restitushon.
Restitushon ta defakto un sèn ku e pagadó di impuesto mester haña bèk di estado pasobra el a paga di mas na impuesto i Ontvanger por disidí di dune un “voorschot” riba esaki. E práktika aki a tuma lugá pa hopi tempu kaba te ku el a bira un tipo di “gewoonterecht” ku e hefe di Ontvanger por basa su mes riba dje.
Informashon ku EXTRA ta disponé di dje ta indiká ku den reunion di Konseho di Minister dia 27 mart e posishon di partidonan di koalishon, MFK i PNP a bini bon kla riba mesa. Esta ku a base di e rapòrt ku SOB a traha no por pretendé di kore ku Trona, pasobra e no a hasi nada malu.
Minister Silvania den e reunion aki lo a presentá ku un proposishon pa duna Trona un prohibishon pa drenta ofisina di Ontvanger. E proposishon aki no a kai den bon tera serka prinsipalmente ministernan di partido PNP i nan a indiká mesora ku e proposishon no ta aseptabel pa nan. Asta ministernan di PNP lo a indiká ku si fòrsa e asuntu aki ku eksistensia di gabinete Pisas II ta na peliger.
Pa kolmo ta trata di un rapòrt ku ta referí na diferente periodo manera na 2022, momento ku Kòrsou ainda tabata sinti efektonan negativo di e pandemia di Corona, pero no ta pone e loke a konstatá den un perspektiva total di tempu kaminda ta indiká kiko resultado di e maneho ku a biba ta ni tampoko ta rekomendá kon pa hasi’e otro. Ta den e kuadro aki ministernan Gilmar ‘Pik’ Pisas i Charles Cooper lo a hiba un kòmbersashon djárason atardi lat ku Trona na su ofisina na World Trade Center. Tambe ministernan pa partido PNP, Ruthmilda Larmonie-Cecilia i Ornelio ‘Kid’ Martina a bishitá Trona na trabou.
Tabata kolaboradó di frakshon di partido MAN, Eugene Cleopa ku a mustra riba e maneho sosial/humano di Ontvanger ku manera ya menshoná ta unu ku ta na diskreshon di Ontvanger pa hiba. Tambe el a ekspresá e sperensa ku mas pronto posibel parlamento skucha Trona i asina tende e otro banda di e medaya.
Alabes Cleopa a mustra riba e echo ku minister di Finansa, Javier Silvania ainda no por bini parlamento pa kontesta pregunta riba su desishon pa kanselá 3 mion na debe di impuesto sin ku el a presentá den parlamento promé. Entre otro parlamento a puntra e minister pa e splika e base legal di su desishon.
