INDIANAPOLIS, INDIANA, MERKA, AP.- Por lo ménos dos warwarú a asotá e parti sentral i nortsentral di Indiana djárason, segun Servisio Nashonal di Meteorologia.
E agensia a publiká un atvertensia di warwarú kaminda ku a atvertí pa un ” warwarú grandi i destruktivo konfirmá na 16 kilometer ost di Kokomo”.
E meteorólogonan Dave Tucek a señalá ku un warwarú a move di e parti sùitwèst di Kokomo pa e parti ost-sentro di e siudat ei. El a agregá ku tabatin un notifikashon di daño, pero no tin detayenan pa esaki.
E kanal di televishon lokal WTHR a mustra imágennan di palunan ku a kai i un Starbucks dañá den e zona.
E servisio di meteorologia a indiká ku polis estatal di Indiana a opservá un warwarú na nortwèst di New Ross, den kondado di Montgomery, kual ta keda 56 kilometer na nortwèst di Indianapolis, kual tabata move pa parti ost.
No tabatin reportahenan inmediato di personanan heridá.
