NEW YORK, AP. – Presidente di Costa Rica Luis Guillermo Solis a bisa ayera ku e mas òf ménos 4 mil migrantenan haitiano i afrikano ku ta plamá den e pais a generá tenshon sosial signifikativo den zonanan pober kaminda nan ta situá debí na nan diferensianan kultural ku Costa Rica.
“E komunidatnan ta realmente kansá”, asina Solis a splika durante di e entrevista ku Associated Press na New York.
E presidente a bisa ku durante e promé ola migratorio ku e pais a eksperimentá, ora entre òktober 2015 i febrüari 2016 a yega 8 mil kubano na e pais, e impakto kultural no tabata asina grandi pasobra e kubanonan ta papia spañó i ta kompartí hopi aspekto kultural ku e kostarisensenan. haitianonan i afrikano ku ta den e pais sinembargo tin un kolo di kueru, kustumbernan religioso diferente i diferensianan kultural di tur tipo, manera e echo ku hopi afrikano no ta kome porko, asina e mandatario a indiká.
“E nivel di kansansio ku e komunidat kostarisense tin i e diferensianan entre e dos fluho migratorio ta asina grandi ku tin un resistensia formal”, asina el a bisa.
Die8milkubanonan, Costa Rica a logra atraves di akuerdo ku 6500 a keda transportá pa Merka. Un di e prioridatnan di Solis durante di su biahe pa New York pa partisipá den dos kumbre di refugiado na Nashonnan Uní i den e debate anual di Asamblea general ta pidi yudansa na e komunidat internashonal pa asistí Costa Rica pa ku e fluho sin presedente di ekstranhero ku ta yega e pais.
