..riba foto por mira e tres ministernan ayera den sala di parlamentu. foto for di Fb di minister Martina.
WILLEMSTAD.- Minister Charles Cooper a indiká ayera den parlamentu ku mester traha riba e tres “E”-nan den tráfiko. El a trese esaki dilanti den reunion ku frakshon di PAR a pidi. Frakshon di PAR a pidi e reunion ku tres minister kual ta Minister di V.V.R.P. sr. Charles Cooper, Minister di Hustisia sr. Shalten Hato i Minister di B.P.D. sr. Ornelio “Kid” Martina. E reunion ta enkuanto situashon di seguridat den tráfiko riba nos pais, i un maneho nobo di tráfiko pa skapa bida di nos siudadanonan.
Minister Cooper a pidi tempu pa kontesta e preguntanan.
Pero e ke trese dilanti ku ta su konvikshon pa por haña mihó seguridat mester traha ku e tres “E”-nan. E promé “E” ta di “Education”, esta edukashon di pueblo; di dos “E” ta “Engineering” esta responsabilidat di VVRP pa traha kaminda, lus di tráfiko, rotònde etc; I di tres “E” ta “Enforcement”, kual ta mantenshon di órden riba via públiko. Pa minister Cooper “Enforcement” ta e pia di mas grandi, i tin di aktua muchu mas.
Ta den e tres “E”-nan tin di sigui bati kabes ku parlamentu p’asina yega na enforsá i pone medionan disponibel pa e tres “E”-nan, si hasi esei huntu. Pasobra un dje preguntanan ta kon parlamentu huntu ku gobièrnu por yuda pensa.
Sr. Cooper a bisa ku tin pregunta ku ta bai 10 aña atras, i e no tin e kontestanan awor aki. Konhuntamente ku su dos koleganan, e ta pidi 1 siman pa por bin bèk i hasi kontesta riba preguntanan.
Sinembargo aki un siman no por tin reunion. Pasobra segun presidente di parlamentu sra. Charetti America-Francisca, mirando ku aki dos siman tin reunion riba presupuesto den komishon sentral, parlamentu no por kaba di atendé e reunion aki, i ta suspendé e reunion te próksimo aviso.
