WILLEMSTAD – Ministerio Públiko a apelá sentensia den e kaso ku a haña e nòmber Inex 2.0 kontra 5 hòmber ku a keda apsolvé di kulpa.
Ta trata di e robo di 600 kilo di droga ku a tuma lugá na warda di reshèrshi, den e anochi di 13 pa 14 di òktober 2018 na Garipitu wèg. Ministerio Públiko a akusá 8 persona di tabata involukrá den e kaso aki.
E eks polis M. Mariano i su ko akusadonan C. Jones, I. Tromp i e dos rumannan R. i J. Urbano, a keda akusá di tabata esnan ku a kometé e robo. E hòmbernan N. Lopez-Penha, J. Sanchez Prettel i A. Paula Toribio ta esnan ku a keda akusá di a bende e droganan.
Dia 28 di sèptèmber último wes den korte di promé instansia, a apsolvé Mariano, Tromp, Jones i e dos rumannan Urbano di e robo di 600 kilo.
Esaki sigur a resultá den un sla enorme pa Ministerio Públiko, mirando ku tabata trata di un investigashon grandi ku a dura hopi tempu.
Banda di esaki Ministerio Públiko ta konvensí ku e 5 akusadonan Mariano, Jones, Tromp i e dos rumannan Urbano, ta esnan ku a kometé e robo.
Esaki ta e motibu ku nan a apelá e sentensia kontra di e akusadonan. Pa loke ta trata e 3 otro ko-aksuadonan, N. Lopez-Penha, J. Sanchez Prettel i A. Paula Toribio, Ministerio Públiko a duna di konosé ku lo no apelá kontra nan sentensia.
