Pago ta bira posibel via QR code
WILLEMSTAD. – Melkar Prepaid Card a introdusí un opshon di pago nobo usando teknologia inovativo, hasiendo fásil pa klientenan paga kualke kompra via di nan propio telefòn òf dispositivo digital usando un simpel QR code.
E kompania a keda establesé na aña 2020 komo un entidat finansiero ku lisensia prinsipal di MasterCard International i ku e vishon i meta di inkluí i integrá su klientenan den e merkado digital di pago minimalisando e riesgonan di transakshonnan efektivo. Ta ofresé diferente tipo di tarheta Prepaid di MasterCard, ku por wòrdu kumprá na un manera fásil i ku masha poko trámite, pero ei mes ofresiendo e seguridat na e kliente ku ta formando parti di un kompania responsabel i ku ta kumpli ku tur rekerimentu legal establesí lokal, i internashonalmente. Ku e tarheta aki por paga kuentanan di utilidat, hasi kompra ‘online’, bai di biahe, por kumpra den kualke establesimentu lokal. Ku introdukshon di Melkar Pay, ta laga klientenan sera konosí ku un método di pago inovativo i mesora aksesibel.
Pagonan inmediato di konsumidó pa komersiante na e punto di benta usando únikamente un QR code ta un di e balornan agregá na e portafolio digital di Melkar Prepaid Card. Di e manera aki ta generá un oportunidat úniko di integrá aun mas tantu e ‘pòtmòni digital’ di e konsumidó. Empresarionan grandi i chikí por ofresé e opshon di pago di Melkar Pay.
E komersiante di futuro ta bira un ‘merchant’ di Melkar. Pagonan ‘online’ ta birando mas i mas popular i tin un bentaha grandi kompará ku plaka kèsh. Esaki ta motibu tambe ku pagonan via QR code ta wòrdu kada bes mas usá pa klientenan i altamente aseptá pa empresanan ku ke ofresé mas opshon di pago. Ku e método di pago via un QR code, sin tarheta, sin kèsh, i sin kontakto físiko- e kliente por hasi pago fásil i lihé ku un solo ‘klik’. Ademas, e transakshon ta na florin!
Komo ‘merchant’ mester únikamente pone e QR code na e kaha, òf riba kualke pantaya digital ku tin den e establesimentu. Na momentu ku e kliente habri e aplikashon di Melkar, i ‘scan’ e QR code usando e kámara di su telefòn via di e aplikashon, outomátikamente tur detaye di e establesimentu ta wòrdu yená i e kliente por hasi su pago ku un ‘klik’. Fásil, Lihé i Sigur.
