MONTREAL, CANADA, AFP.- E empresa merikano Moderna lo habri un planta pa produsí vakuna kontra COVID-19 i otro infekshonnan di respirashon na Canada, segun anunsio di gobièrnu merikano i e empresa djamars.
Minister di Industria Francois-Philippe Champagne a hasi e anunsio huntu ku e hefe di Moderna. E planta lo yuda e empresa produsí vakunanan mirando ku esaki ta luchando pa kumpli ku demanda mundial.
“E kolaborashon ta duna Canada akseso na vakunanan di mRNA, produsí pa kombatí vírusnan ku ta afektá respirashon inkluyendo COVID-19, influenza i RSV entre otro”, segun indikashon di e empresa den un informe.
“Si surgi un vírus nobo, manera un variante di Zika òf Ébola, Corona òf grip, e gobièrnu kanades por disidí ku lo usa sea un parti òf kapasidat kompleto di e planta pa kombatí e vírus i protehá e pueblo kanades”, asina Champagne a bisa.
No a revelá kiko gobièrnu a kontribuí kuné finansieramente. Pero e kompania, ta invirtiendo míles di dòler den e fasilidat.
E hefe ehekutivo di Moderna, Stephane Bancel a bisa ku e fasilidat ta keda kla na aña 2024, i lo produsí 30 mion vakuna pa aña.
“Den e último seis pa nuebe luna, desénas di pais a tuma kontakto ku nos pa konstruí plantanan di vakuna riba nan teritorionan”.
