WILLEMSTAD – Den ménos ku 24 ora tráfiko insigur di Kòrsou a registro dos morto. E último a tuma lugá awe mardugá alrededor di 3or riba Helmin Magno Wiels Boulevard na altura di Pali Mangel Resort. Outoridatnan a keda notifiká di un aksidente grave i mester a saka unidat di Brantwer Mundu Nobo i tambe ambulans di FKA pa e sitio. E víktima a lamentablemente a keda pega den e outo ku tabata un Honda pretu CRV. E shofùr a pèrdè kontrol i e aksidente tabata asina violento ku e outo a saka un di e palmanan kompleto benta abou. E paramedikonan di FKA no por a hasi nada mas pa e víktima di e aksidente na e sitio. Outoridatnan a yama dòkter di polis pa bin konstatá morto. Departamento di Tráfiko di Kuerpo Polisial mesora a inisiá investigashon nesesario pa determiná kousa eksakto di e aksidente aki. E víktima no a keda identifiká te na e momentu nan aki.
Den Extra Journaal di 9:30 awe mainta lo tin video di e situashon lamentabel aki
