HAVANA, AP.- E programa Mundial di Alimento (PMA) lo apoyá 180.000 persona di oriente kubano ku a wòrdu afektá pa orkan Matthew.
Un komunikado di e sistema di Nashon Uní a duna asistensia di kuater mion dòler pa kubri algun nesesidat alimentario na e pueblo di kuater munisipio di provinsia di Guantanamo: Baracoa, Maisi, Imias i San Antonio. Esaki ta esnan mas afektá pa e orkan ku a pasa den Karibe siman pasá.
E yudansa a wòrdu kordiná ku gobièrnu kubano, segun un nota di Nashon Uní.
Esaki lo konsistí di entrega di aros i maishi. Esakinan ta básiko den dieta di e pueblo kubano. E demanda ta wòrdu kubrí ku alimentonan ku PMA ya tabatin warda den e pais pa kasonan di desaster.
Te ainda, e gobièrnu no a informá kuantu e pèrdida pa Matthew. Segun PMA “tabatin pèrdida di kosecha i dañonan importante na agrikultura inkluyendo kasnan i infrastruktura públiko”.
