BRUSELAS, AP.- Organisashon di Tratado di Nort Atlántiko (NATO) i e fabrikante merikano di avion Boeing a sera un kontrakt di 1.000 mion dòler djárason. E akuerdo ta pa modernisá e flota antikuá di avion di vigilansia di e organisashon pa sigui presta servisio te na 2035.
E akuerdo kual ainda no a wòrdu firmá, a keda anunsiá algun dia promé ku e kumbre di 4 desèmber na London. Akinan e aliansa di seguridat mas grandi na mundu lo selebrá su di 70 aniversario.
Presidente merikano Donald Trump posiblemente lo pidi miembronan europeo i di Canada pa e paisnan oumentá nan gastu di defensa. Oponentenan ta bisa ku su intenshon ta pa logra sera akuerdonan di negoshi pa e industria di defensa di Merka.
E anunsio di kontrakt ta un rekordatorio oportuno ku e plaka ta destiná pa Boeing, ounke kontratistanan europeo lo partisipá den e modernisashon.
E avionnan aktual a wòrdu atkerí durante e Guera Friu aña 1977, temporada ku Jimmy Carter tabata presidente di Merka, i temporada ku Europa tabata pasando dor di un krísis ku Union Soviétiko. E 14 avionnan di Boeing E-13 a kosta kasi 8.000 mion dòler e temporada aki.
