NEW YORK, AP.- Ricardo Reyes ta leal na Partido Republikano, sinembargo, den próksimo simannan e nikaragwense aki ta bai hasi tur kos posibel pa e demókrata Hillary Clinton yega Kas Blanku. E motibu ta Donald Trump, e magnate ku republikanonan a nominá komo su kandidato pa presidente di Merka pero ku a generá kontroversia pa mayoria di su proposishonnan, inkluyendo konstrukshon di un muraya na frontera ku México i prohibí entrada di musulmannan den e pais.
“Mi ta krea ku lógika ta hopi simpel. Mi ta kere ku si Trump gana, e partido republikano ku nos konosé awe ta keda destruí”. Asina Reyes a bisa na The Associated Press.
“Si Clinton gana, e repúblikanan lo tin un oportunidat pa wòrdu reorganisá, eliminá e elemento venenoso ku tin awor den e partido i logra un bon kandidato republikano pa aña 2020, ku ta na fabor di e merkado liber, limitá gobièrnu i logra un seguridat nashonal efektivo”. Asina e nikaragwense a indiká.
Reyes di 42 aña, eks funshonario di gobièrnu di presidente republikano George Bush, a krea un grupo di boluntario yamá R4c16.org ku e ophetivo di konvensé mas siudadano i polítiko republikano posibel pa no simplemente no vota pa Trump pero pa ekspresá nan apoyo pa Clinton i vota pa e den urnanan.
