No por kore rísiko di entrega muchanan (lancha) sin mas!

Minister Shalten Hato a bisa EXTRA

WILLEMSTAD.- Tráfiko ilegal di hende òf tambe kontrabanda di hende ta un tema diskutí mundialmente i Kòrsou no ta un eksepshon pa atendé kuné seriamente. Ta netamente den e kuadro aki, manera nos a komprondé di minister di hustisia Shalten Hato, tin e menornan ku a drenta ku lancha siman pasa djaweps, den diferente instituto pendiente nan situashon keda klara.

E situashon por ta mustra fásil, pero e ta muchu mas kompliká i muchu mas serio ku hopi ta kere., Minister Hato den entrevista ku EXTRA a splika ku pais Kòrsou ta respetá tratadonan internashonal i sigur tratado di mucha. Banda di esei tin nos areglo di estado ku tin e derechinan humano i derechi fundamental di kada persona, ku gobièrnu di Kòrsou tin di sòru pe. Banda di esaki tin e  ‘Landsverordening Toelating en Uitzetting’ i tin e maneho ku minister ta hiba den kuadro di e LTU.

Ora un mucha yega ku lancha, outoridatnan lokal (KPC) ta tuma over for di Warda Kosta. Den e kaso aki ta yama GMN pa hasi chekeo riba un ke otro enfermedat riba e personanan. Despues ta sigui ku investigashon pa sa ken a stür e lancha i si nan tin identifikashon i si tin menor ta kuminsá investigá di ken e yunan ta. Despues ta wak si e personanan por Sali ku un ‘Meldplicht’ esta ku tur siman mester mèldu na Rio Canario, pa tuma nota unda nan ta biba, sperando nan deportashon. Si nan no pidi protekshon, tur ta haña dekreto ku na ta wòrdu deportá. Si nan no tin un kaminda pa keda, nan no por bai ku e  ‘meldplicht’ i mester sera nan, sperando nan deportashon.

Awor nan ta bin ku yu manera últimamente. Den e kasonan asina ta wak si por pone mama i yu un kaminda, òf si tin instansia ku ke para garantia pa nan i asina hustisia ta duna e espasio ei i asina e mama por keda ku ‘Meldplicht”. Komo minister e ta kere ku no por sera un mucha, tampoko huntu ku su mama. I p’esei den e maneho nan no ta hasi esei tampoko.

Den e kaso di djaweps pasa, segun minister Hato, algun mucha a yega ku lancha i niun hende riba e lancha no ta nan mayornan. Ni maske kua lancha ku drenta, esun ku ta stür e lancha òf  ku investigashon saka afó di a trese hendenan ilegalmente, e ta keda persiguí pa kontrabanda di hende.

Den e kaso spesífiko aki komo niun di e hendenan ta mayor di e muchanan, a start un investigashon, pasobra e sospecho ta ku e hendenan riba e lancha ta sospecha di kontrabanda di mucha, pasobra no tin mayornan di e muchanan riba e lancha. Bou di ministerio públiko tin investigashon penal andando den e kaso spesífiko aki.

Minister Hato a bisa ku a laga algun hende ku tabata riba e lancha den libertat, pero nan ta keda sospechoso. A laga nan den libertat pasobra OM no a mira motibu pa nan keda sera. E supuesto mamanan a presentá na warda di polis i a manda karta pa minister Hato, pa nan uni ku nan yunan. “Pero esei no por wòrdu honra sin mas, pasobra e hendenan a djis presentá i a bisa di a komprondé ku nan yunan ta einan. I konsekuentemente outoridat ta bisa ku nan no sa, ku ta nan ta mama i p’esei nan no por bai ku e  yunan, pasobra no sa ken nan ta. Miéntras no por demostrá òf prueba ku ta bo yu, bo no por bai kuné sino gobièrnu mayan ta keda tilda di a partisipá na kontrabanda di mucha”, minister Hato a enfatisá.

Ta esei ta e situashon aktual i p’esei no a entrega e yunan. Minister ta di akuerdo ku tur mucha mester ta serka nan mayor, pero mester proba si ku ta mayor di e muchanan. E muchanan mes ta bon kuida. No a laga nan bai pasobra niun hende por a proba ku ta nan yu. E personanan ku a laga bai ta sospecha ketu bai di kontrabanda di mucha.

I miéntras tantu segun minister Hato, e investigashon mester indiká ken ta nan mayornan i konhuntamente ku kònsùl i kanalnan diplomátiko lo atendé pa drenta den kontakto ku famia di e muchanan. Si nan mayornan no ta aki nan lo mester keda deportá pa nan mayornan.

Ultimamente kontrabanda di mucha den Latino Amérika ta sosodé espantosamente haltu i p’esei minister Hato a bisa ku Kòrsou no por kore rísiko di entrega e muchanan sin mas. Kontrabanda di hende i voral di mucha no ta keda tolerá minister a enfatisá.