WASHINGTON, AP. – Presidente Barack Obama a rechasá ku Merka tabatin konosementu òf implikashon di e gòlpi di Estado frakasá di siman pasá den Turkia. El a señalá ku e vershonnan ta “falsu”.
Obama a bisa ku el a laga e postura aki evidente pa presidente turko Recep Tayyip Erdogan na momento ku ámbos a kòmbersá na telefòn na komienso di siman. E mandatario merikano a señalá tambe ku el a pone énfasis pa Erdogan garantisá tur esnan den gobièrnu turko ku kualkier informashon den e sentido aki ta falsu.
Kontrali na esaki, e relashonnan diplomátiko i seguridat di merikanonan na Turkia ta drenta den peliger, segun presidente.
“Tur e vershonnan ku nos tabatin konosementu anterior di un intento di gòlpi, ku Merka tabatin partisipashon i ku nos no ta apoyá e demokrasia turko kompletamente ta kompletamente falsu”. Asina Obama a afirmá durante un konferensia di prensa konhunto na Kas Blanku ku presidente mehikano Enrique Peña Nieto.
Despues di e intento di gòlpi, Obama a publiká deklarashonnan skibi kaminda e ta afirmá apoyo na e gobièrnu sivil skohe demokrátikamente den Turkia.
E mandatario merikano tabata preokupá djabièrnè di e represhon di Erdogan desde ku el a frustra intentonan pa kit’é di su puesto komo presidente.
Turkia, aliado di NATO, tin un partisipashon krusial den e koalishon enkabesá pa Merka ku ta kombatí Estado Islámiko. Yagmentunan merikano ta tuma lugá desde base aéreo Incirlik na sùit turko pa efektuá atakenan aéreo kontra ekstremistanan di EI na Siria i Irak.
