Rene Mar Pinedo; Head chef na The Feathered Nest Inn Inglatera
The Feathered Nest Inn ta un restorant na Inglatera. E hóben yu di Kòrsou Rene Mar Pinedo ta ‘head chef’ einan i ku esaki e ke mustra ku ta posibel pa bo hasi bo soño realidat. Den su kaso bai hasi loke bo ke i laga bo kultura bai te leu, unda ku ta i habri bo vishon.
E amor
Rene Mar a bisa ku e no kier a bira ‘head chef’ en prinsipio pero semper e tabata ku su mama den kushina pero nunka tabata su espektativa pa bira kòki. E tabata mas den pinta i traha kos ku su man. Pero el a realisá ku e tin di sinta pa tempu largu pa hasi algu i esei e no por. Su yùfrou na skol a bis’é ku e ta bon den pintamentu pero mihó e wak kiko tin mas aleu di ofresé. Asina el a drenta horeka i kuminsá di un forma simpel. Asina su amor pa kushina a kuminsá habri mas i mas.
I el a subi e kaminda
Su mama tabata un persona ku ta hasi enkuentronan sosial na kas, fiesta chikí, famia ta trese kos i su mama ta kushiná. Esaki tabata sosodé mas riba djadumingu i asina e tabata yuda. El a kuminsá lesa buki, wak programa i a ripará ku ta un karera ku tòg bo por yega basta leu kuné, basta bo ta stima loke bo ta hasi. Asina segun Rene Mar el a subi e kaminda.
Proyektá loke bo ke
Rene Mar a kuminsá den chikí, trahando den un restorant na Kòrsou na Boogjes den Punda. Despues di einan el a drenta den e tereno di hotèl i su amor a sigui krese pa kushiná. Einan el a ripará ku ta esei e ke hasi. E amor pa kushina a bira mas profundo. El a siña mas di e otro shefnan di otro pais. Nan tabata mira su pashon i ambishon pa krese i nan tabata dun’é mas konosementu. El a bisa loke nan duna bu bo tin di proyektá i hink’é den e kuminda. Rene Mar a bisa ku semper e ta pusha pa mas i mas. Asina el a ripará ku ta e mesun kos na Kòrsou i e ke mas ku esei.
Estudio na Cas Spijkers Academie
Di einan el a kuminsá pensa kua pais e bai. Su pais tabata Hulanda pa e sigui. E tin famia na Hulanda i el a disidí di bai einan pa purba. Su eks partner a apliká pa e bai e skol di mas haltu na Hulanda ku ta Cas Spijkers Academie, un skol tòp ku ta topa solamente 60 mucha so pa aña. E nivel di kushinamentu na e skol ei ta hopi. Rene Mar ta kòrda ku el a bai Hulanda mas bien pa kasamentu di su ruman hòmber i ora e tabata einan, e mener a bisa pa e bin einan pa kushiná. Despues e mener a wak e den su kara, bai bin bèk papia ku e shef di e skol i a yam’é na e skol. Rene Mar ta kòrda ku e tabata number 61 pa drenta e skol, ke men el a pasa e kantidat ku e skol tabata tuma i tòg a logra drenta.
“Mi pashon”
Rene Mar a ripará mas i mas ku ta kushina ta su pashon i Cas Spijkers Academie ku su 60 studiantenan no ta nada fásil. Loke Rene Mar a siña einan, su amor a krese mas i mas. El a traha na Hulanda na Rosemarijn na Maastricht. Einan tabata dos restorant di kual un di karni i un di piská i el a traha na kada un pa 6 luna. Rene Mar a biba kuater aña i mei na Hulanda. Tambe el a traha na e skol mes tambe, asina haña mas i mas eksperensia.
Rumbo pa Inglatera
Awor aki Rene Mar ta Head Chef na The Feathered Nest na Inglatera. Loke pa Rene Mar ta diferente ta e kultura si e kompará sali for di Kòrsou, pasa Hulanda i awor na Inglatera. Bo por sinti bu hopi lihé for di lugá i esei no por stòp bo di hasi nada. E no por stòp bo di logra loke bo ke logra den e mundu aki. Bo por sinti lihé ku bo no ta logra pasobra hende ta diferente, bo forma di sasoná kuminda ta otro. Per bo tin di pusha i laga nan sa ku bo tei. Si bo no pusha bo ta kai afó. Esaki a distinguí Rene Mar pero e no ta difísil si bo djis pone bo mes den loke bo ta hasi.
Kushiná ku sabor
E kuminda no ta diferente. I esei ta tur kaminda. Ta e mesun siboyo, mesun konofló etc., pero ta e manera di prepar’é ta hasié diferente. Teniendo na kuenta ku Kòrsou ta kushiná ku hopi speserei, Rene Mar a bisa ku hende di einan a sali for di nan zona konfortabel i a bai paisnan den Karibe i nan a purba e sabor. I e sabor ei nan ke tin riba un base regular. Den su trabou el a ripará ku e hendenan ta gusta su sabor i su speserei. Asina poko poko teniendo na kuenta e reakshonnan, e tabata puntra e shef si e por aplik’é. I asina el a laga algun sabor lòs den kushina i hende a pega ku nan. No por pone riba e palèt di hopi speserei pero a ripará ku nos tei i awor hendenan ta bai e restorant ei pa e sabor ku nan tin einan.
Octupus tur forma
Rene Mar a papia di su plato preferí i kiko mas e ta gusta prepará na The Feathered Nest. Su plato preferí awor ta Octupus. Ta gusta kuminda di laman i awor aki 90% di e menú ta kos di laman. E tin octupus i piská riba menú pero e ta gusta kushiná octupus. El a prepar’é ku bonchi, choriso, siboyo i tambe el a pone octupus di BBQ. E ta kòrda ku den su promé entrevista ku e doño di e restorant el a bis’é ku si e tuma over e ke bai un tiki den sabornan diferente.
Kuminda i servisio ta kana pareu
Pa Rene Mar loke ta sòru pa un kliente bin bèk ta pa kuminda i servisio. Si no duna un bon kuminda e kliente no ta bin bèk i si no duna bon servisio tampoko e kliente ta bin bèk. E servisio i kuminda mester hasi un anochi inolvidabel pa e kliente. Mester sòru pa tur bia ku e kliente bin, e kuminda mester ta meskos i sòru pa tur hende ku ta traha ku bo tin mesun smak ku bo pa asina tur kos keda riba mesun nivel.
Sin amor no drenta horeka
Kòrsou ta kresiendo den turístiko i ta entusiasmá hóbennan pa sigui studia den e área di horeka. Loke Rene Mar por bisa den e kuadro aki ta ku den turismo bo ta bira bo mes. Bo ta siña hopi den idioma i hopi mas. Den su kaso el a interaktuá ku hopi hende den horeka i tur esaki a hasié mihó. E ta gusta hasi hende kontentu i esei e ta hasiendo pa 18 aña kaba. Bo mester stim’é sino e no ta pa abo. E ta rekerí tempu i pashon i sino e no ta funshoná. Pa e generashon nobo mi por bisa ku si bo gusta interaktuá ku hende, topa hende, gosa den loke bo ta hasi anto Horeka ta pa abo. Pero si no ta algu ku bo ta gusta, si bo ta un ‘introvert’ ta mihó no bai den e direkshon aki. E ta kuestion di duna i bo ta haña bèk. Niun hende ke pa hende sirbi nan ku un kara serio den un restorant. Esei e kliente ke i ta e tipo di hendenan ei nos mester pa hasi un bon trabou. Pashon, amor i bo mester ta eksitá pa hasi e trabou den horeka, segun Rene Mar. Den su kaso e ta stima loke e ta hasi.
Esaki no ta mi máksimo
I The Feathered Nest Inn no ta e máksimo pa Rene Mar. Esaki ta su ‘stepping stone’. E ke habri un restorant ku e nòmber di su mama i di Kòrsou den dje. Esaki no ta kaminda e ta yega pa último pero e ke bai muchu mas leu. I pa loke ta Kòrsou Rene Mar, el a bisa e por ta dos kaminda. E por tin restorant na Inglatera i tin su restorant na Kòrsou tambe. Su soño no ta pa Inglatera so pero internashonal. E ke na Amérika, Hulanda, Inglatera i Kòrsou.
Dushi pero no ta Kòrsou
Pa loke ta Inglatera el a bisa ta un lugá dushi, pero no ta Kòrsou. E wer ta un dia friu i otro kalor, un dia gris i asina e ta kambia. E wer por manda bo abou pero den su kaso e lo no lag’é hasié kuné. E ta gosando di Inglatera. Rene Mar ta dispuesto na duna un man kaminda esaki ta posibel pa por enkurashá hóbennan pa por drenta e área di Horeka. I dia 27 di mart e lo kushiná ku un otro shef ku ta kushina di Inglatera i e lo kushiná karibense. Ya e evento aki ta kompletamente bendé.
