ASUNCION, PARAGUAY, AP.- Paraguay a fortalesé su posishon kontra Venezuela, anunsiando ku e no ta partisipá den e Reunion Grupo Merkado Comun na Montevideo, di Mercosur, rabiá pasó Uruguay a disidí pa entregá presidensia temporal di e bloke duanero regional na e pais karibense den krísis polítiko, ekonómiko i sosial.
“Nos kier pa Venezuela haña un kaminda mas kumbiniente pa un solushon di problemanan interno. Nos no kier mete, pero nos ta kere i nos ta konvensí di e eksistensia di prinsipio i balornan demokrátiko ku nos tur mester respetá”, asina kansier Eladio Loizaga a indiká den un konferensia di prensa.
El a agregá ku Uruguay mester sigui ehersé presidensia temporal te ora Venezuela kambia su situashon. E miembronan pleno di Mercosur ta Argentina, Brasil, Paraguay, Uruguay i Venezuela.
E analista polítiko, Ignacio Martinez a bisa na The Associated Press ku e kaso di Venezuela “ta dividiendo Mercosur den tres pida”.
