WASHINGTON, MERKA, AFP.- E sekretario di Estado merikano Mike Pompeo a bisa ku kisas China tabata na altura di e coronavirus nobo desde Novèmber, renobando akusashonnan ku Beijing no tabata transparente.
“Mi por kòrda ku China a anunsiá e kasonan meimei di desèmber”, asina Pompeo a bisa den un entrevista. “Nan tabata slou ku identifikashon di e malesa aki, inkluyendo Organisashon Mundial di Salú”, segun el a bisa na radio.
Pompeo a bisa ku ainda Merka kier mas informashon di China, inkluyendo e muestra original di SARS-CoV-2, e vírus detektá na Wuhan.
Pompeo a sigui bisa ku e problema di transparensia aki ta importante pa komprondé kiko a sosodé den Novèmber, Desèmber i Yanüari. “E vírus aki ta impaktando demasiado bida na Merka i mundu kompleto”, asina el a agregá.
Inisialmente, China a mantené e informashon sekreto i mantené esnan ku a ‘reda’ riba e informashonnan aki silensio. E promé rekonosimentu ofisial ku a kombertí den un pandemia a sosodé riba 31 di desèmber, despues ku outoridat a reportá kasonan misterioso di pulmonia.
Michael Ryan, direktor di emergensia di Organisashon Mundial di Salú, a bisa ku e entidat di Nashon Uni a dirigí un evento públiko na Wuhan riba 4 di yanüari, kaminda a proveé informashon “detayá” na paisnan miembro. Presidente Donald Trump su atministrashon a kritiká ámbos China i OMS, kulpando nan di no a hasi sufisiente pa para e malesa ku a mata mas di 180.000 hende na mundu.
