OUAGADOUGOU, BURKINA FASO, AFP.- Sospechosonan a masakrá por lo ménos 160 sivil, inkluyendo 20 mucha den un pueblo na nort di Burkina Faso. Esaki tabata e atake mortal di mas pió desde komienso di violensia islamita na aña 2015, segun indikashon di ofisialnan lokal djadumingu.
E atake a sosodé den oranan trempan di djasabra i a kontinuá ku matansa di 14 persona den pueblo di Tadaryat djasabra, den e mesun region kaminda tin teroristanan ligá na al-Qaeda i Estado Islámiko.
Fuentenan lokal a bisa ku a rekuperá kadaver di kasi 160 persona serka di frontera di Mali i Niger.
Outoridat lokal a bisa anteriormente ku 138 persona a muri i gobièrnu a indiká ku 132 a muri i 40 persona ta heridá. Gobièrnu a bisa djasabra ku forsanan di defensa i seguridat ta trahando pa “neutralisá” e teroristanan aki i restourá trankilidat di áreanan poblá.
E sekretaria general di Nashon Uní Antonio Guterres a bisa ku e komunidat internashonal mester reforsá su esfuersonan pa estadonan miembro den e bataya kontra ekstremismo violento.
