FRANKFURT, ALEMANIA, AFP.- Eks presidente di Volkswagen Martin Winterkorn mester paga un suma di 11 mion euro na e empresa pa kumpli ku akusashonnan di negligensia relashoná ku e skandal di “dieselgate”, segun indikashon di fuentenan konosí ku e kaso.
“Konseho di vigilansia a validá puntonan prinsipal di e akuerdo amistoso”, segun indikashon di un bosero di e grupo, sin duna mas detaye.
Segun fuentenan konosí ku kaso, e eks presidente di maneho di e grupo aki mester paga 11 mion euro pa “dañonan i interes pa inkumplimentu” durante su funshon.
Un skandal kolosal di manipulashon di miónes di outonan diesel di VW i Audi a sali na kla den sèptèmber 2015. E intenshon tabata pa laga e outonan manipulá parse di ta ménos kontaminante.
Volkswagen a informá ku e empresa tin intenshon di eksihí indemnisashon di eks ehekutivonan di e kompania. Semper Winterkorn a ninga su responsabilidat den e kaso aki.
