ESTADOS UNIDOS.- Pa prome bia den historia, preis di krudo merikano a kai i bira negativo, pues barí di krudo ta negativo, asina un informe merikano ta indiká. E motibu prinsipal ta ku no tin demanda pa krudo riba merkado.
Analistanan mundial ta mustra ku e preis di krudo a bira negativo awe djaluna miéntras ku bendedónan a sigui diskutí riba e kaida den demanda debí na Corona vírus. E kaida mas pisá tabata un kontrakt di benta basá riba un valuta organisá, ku ta kaduká djamars, kitando for di un kontrakt di mas tempu ku ta negoshá riba 20 dòler pa barí.
E krudo West Texas Intermediate ku un tempu di entrega na mei awor, a kai mas ku 100% i a stabilisá na 37,63 dòler pa barí. Mientrastantu e krudo Brent a pasa kaba pa e kontrakt di yüni kaminda a negoshá un tarifa di 8.9% mas abou i a bend’é na 25.58 dòler pa barí. E kontrakt di West Texas Intermediate di yüni, ku ta kaduká 19 di mei, a kai ku 18% i a bende na 20.43 dòler pa barí. E kontrakt di yüli tambe a baha ku mas o ménos 11% i a bende na 26.18 dòler pa barí. Analistanan ta mira ku Corona vírus a dal aktividatnan ekonómiko un sla formal rònt mundu i na mes momentu a kaba ku e demanda pa petroli. Anteriormente OPEC i su aliadonan den produkshon di petroli a logra un akuerdo históriko kaminda a redusí produkshon ku 9.7 mion barí pa dia kuminsando 1 di mei. Segun mayoria, esaki lo no ta sufisiente pa kontrarestá e kaida den demanda.
Na Korsou e espektativa ta pa logra akuerdo ku grupo Klesch di manera ku e grupo ku ta pendiente pa tuma operashon di e refineria lokal por kuminsá hasi uso di Curaçao Oil Terminal (COT) pa almasená krudo na e momentunan aki. Awor kapasidat di almenahe ta bal hopi!
