WILLEMSTAD.-E desaroyonan na Medio Oriente ta motibu di hopi preokupashon. Promé Minister sr. Gilmar Pisas ta informá ku di parti di Gobièrnu di Kòrsou ta hasiendo tur loke ta posibel pa yuda siudadanonan lokal ku ke sali for di Israèl.
Basa riba e informashon ku a risibí di parti Ministerio di Asuntunan Eksterior di Reino (Ministerie van Buitenlandse Zaken) a komprondé ku e Embahada na Tel Aviv i e servisionan di informashon di Ministerio di Asuntunan Eksterior di Reino ta yuda e personanan ku a registrá i ku tin un pasaporte hulandes i no riba for di unda nan ta bini. Defensa Hulandes a manda un avion militar ayera i lo bai hasi esaki awe, mañan i djasabra pa saka personanan ku tin un pasaporte hulandes ku ke sali for di Israèl.
Banda di esaki Ministerio di Asuntunan Eksterior di Reino a indiká ku no por sa ku eksaktitut ku bou di e personanan ku ya a keda yudá por tin abitantenan di e.o. Kòrsou.
Gobièrnu di Kòrsou ta hasi un yamada urgente na tur siudadano di Kòrsou ku sa di un yu di Kòrsou ku tin pasaporte hulandes i ku ke sali for di Israèl, pa nan subi riba e website Informatieservice Buitenlandse Zaken (nederlandwereldwijd.nl) pa registrá nan mes òf yama e number di telefòn aki +31 247 247 247.
Di parti di Gobièrnu di Kòrsou lo sigui vigilá e situashon di aserka. Manera EXTRA a informa un ratu pasá, djabièrnè awor lo tin un orashon speshal pa Israel.
