SIUDAT DI PANAMA, PANAMA, AFP.- Sentenáres di persona a protestá djaluna kontra subida di preis i korupshon na Panama, kaminda manifestantenan a sera kareteranan prinsipal den e pais.
Sindikatonan i organisashonnan popular a protestá den diferente punto na Panama pa pidi gobièrnu eliminashon di impuesto di kombustibel i kongelashon di produktonan básiko.
Den provinsianan oksidental di Veraguas i Chiriqui, na frontera ku Costa Rica, manifestantenan a sera e kaminda ku e ta konektá e pais ku sobrá parti di Amérika Sentral, miéntras ku a organisá un marcha dilanti di Asamblea Nashonal di Diputadonan den Siudat di Panama.
E oumento di preisnan di produktonan básiko “ta pone ku kada biaha ménos hende por biba na un manera digno”, segun indikashon di Saul Mendez, sekretario general di sindikato di konstrukshon Suntracs, esun di mas grandi den e pais.
Panama ta enfrentando su di dos siman di protestanan pa e subida di preis di kombustibel, ku a baha na ménos ku un dòler pa liter den yanüari i subi 1,51 dòler fin di yüni.
