COLOMBO, SRI LANKA, AFP.- Presidente di Sri Lanka, Gotabaya Rajapaksa, a bandoná e pais djárason mardugá den un avion militar i a yega Maldivas, despues di vários luna di protesta pa e krísis ekonómiko di mas pió den historia di e pais.
Despues ku míles di manifestante a drenta su palasio presidensial djasabra, Rajapaksa a primintí ku e lo renunsiá i ku e lo habri kaminda pa un “transishon pasífiko” di poder.
Rajapaksa ta benefisiá di inmunidat presidensial i por usa esaki pa buska refugio den estranhero i no wòrdu detené den su pais.
E mandatario di 73 aña a bandoná e pais huntu ku su kasa i un bodyguard na bordo di e avion Antonov-31 ku a lanta di e aeropuerto internashonal prinsipal, segun funshonarionan di migrashon.
Un fuente di aeropuerto di Male a konfirmá yegada di e presidente na AFP, kende a keda trasladá pa un sitio no revelá despues ku el a aterisá na Maldivas, un konhunto di isla na sùitost di Sri Lanka, den oséano Índigo.
