LONDEN (AFP).- Prens Harry, kende a yega Londres djamars pa un evento benéfiko, lo no topa su tata, Rei Carlos III, malu ku kanser, durante di su bishita na Reino Uní, segun un bosero.
Prens Harry tin relashon difísil ku e rei i spesialmente ku su ruman, e heredero di korona Prens William, for di despues ku den 2020 el a bandoná su obligashonnan relashoná ku monarka i a instalá su mes na California huntu ku su kasá Meghan.
Sinembargo ,durante di su último bishita na Gran Bretaña, dia 6 di febrüari, el a pasa un ratu na Londres pa mira Carlos, kende e tempu ei a kaba di anunsiá di tin kanser.
E biaha’ki el a yega e kapital britániko pa un seremonia den kuadro di dies aniversario di Invictur Games, un kompetensia internashonal pa sòldánan heridá. A spera ku esei lo habri kaminda pa e bishitá e rei, pero esei “desafortunadamente no ta posibel pa motibu dje agènda hopi yen di Su Mahestat Carlos III”, segun un bosero di Harry.
Nuebe luna despues di su koronashon den mei di 2023, monarka a anunsiá den febrüari ku Carlos III tin kanser. E rei di 75 aña kende ta hañando tratamentu, a reanudá su aktividatnan públiko siman pasá.
