SAN JUAN, PUERTO RICO, AP.- E gobernador di Puerto Rico a anunsiá kambionan den su gabinete djamars, na momentu ku e isla ta prepará pa invertí den un entrada resien di fondo federal dirigí pa yuda e rekonstrukshon pa e dañonan kousá pa orkan Maria. E teritorio ta emergiendo di un reseshon di 12 aña.
Komo parti di e kambionan, e sekretario di Finansa di Puerto Rico lo sirbi komo hefe di despacho i direktor di outoridat finansiero di Puerto Rico lo ta responsabel pa atraé invershonnan nobo. “Puerto Rico ta pasando den momentunan di kambio”, asina e gobernador Ricardo Rossello a indiká.
El a bisa ku e prioridatnan di su gobièrnu ta e rekonstrukshon despues di e orkan, e reforma fiskal, di edukashon i restrukturashon di debe i tambe reformá e sektor di elektrisidat di e isla miéntras ku Outoridat di Energia Eléktriko kier mas privatisashon.
Gerardo Portela, kende tabata direktor di Outoridat di Asesor Finansiero i Agensia Fiskal di Puerto Rico i ku awor ta wòrdu supervisá pa Christian Sobrino, a bisa ku e kier posishoná e isla den foko di invershonistanan.
“Esaki ta un gran reto, mirando loke ta pasando ku e krísis ekonómiko”.
Puerto Rico ta purbando di restrukturá un parti di su debe públiko di mas di 70.000 mion dòler i drenta den e merkado di e kapital.
Raul Maldonado, e hefe nobo di e despacho, a bisa ku e agensia lo wòrdu reformá i lo asigná rekursonan na otro departamentonan usando rekursonan interno.
Mas o ménos 140.000 portorikeño a bandoná e isla di 3,3 mion habitante desde ku e orkan a asotá e pais riba 20 di sèptèmber. Ekspertonan ta kalkulá ku 300.000 persona mas posiblemente ta hasi esaki den e próksimo añanan.
