SAN JUAN. AP.- Direktor di salú públiko di Merka a pidi Puerto Rico pa intensifiká su kampaña edukativo riba Zika, i a atvertí ku pa fin di aña, 25% di e pueblo di e isla lo padesé di e vírus.
Dòkter Vivek Murthy, di bishita riba e isla, a bisa ademas ku outoridatnan lokal mester aselerá su esfuersonan pa eradiká e sanguranan i hasi métodonan antikonseptivo mas aksesibel. Zika ta kapas di kousa deformashon severo di kabes.
” Nos nos por spera muchu mas”, asina el a bisa. “Mi ta preokupá profundamente di kon lihé e vírus ta plama”.
Murthy a splika ku mester di mas fondo pa aliviá e karga di prueba di Zika na Puerto Rico. Outoridat lokal a bisa ku mester di un ofisina di koordinashon pa kampañá pero ku no tin fondo pa krea esaki. E isla a reportá 8.776 kaso, entre nan 901 muhé na estado. Un total di 88 persona a wòrdu interná den hospital, i 27 a wòrdu diagnostiká un parálisis temporal konosí komo Guillain-Barré ku a wòrdu vinkulá ku Zika.
Murthy a bisa ku su preokupashon mas grandi ta muhénan na estado, pues Zika ta afektá beibinan promé ku nan nase i ta laga nan ku defekto na kabes i otro problemanan di desaroyo.
