MOSCOW, AP.- Presidente ruso, Vladimir Putin, a suspendé un akuerdo ku Merka pa eliminashon di plutonio di uso militar, un tema ku tabata un símbolo aserkamentu entre ámbos nashon. E relashon bilateral a deteriorá meimei di tenshonnan pa Ukrania, Siria i otro disputanan.
E tenshon entre rivalnan antiguo di Guera friu a intensifiká den último simannan despues ku un tregua na Siria a kolèps i un atake masivo di ehérsito sirio na Alepo ku yudansa di avionnan di guera ruso.
Departamento di Estado merikano a anunsiá suspenshon di kontaktonan bilateral ku Rusia tokante Siria, despues ku e sekretario di estado John Kerry a menasá ku esaki meimei di atakenan nobo kontra siudat di Alepo. E dekreto di Putin ta bisa ku e medida a wòrdu tumá pasó mester a aktua den virtut di e “menasa nobo pa stabilidat stratégiko, manera resultado di akshonnan hostil di Merka”. Esaki ta inkluí no kumplimentu di Washington di parti di e trato. Sinembargo, el a agregá ku Rusia lo mantené plutonio di uso militar pafó di e programa béliko. Segun e akuerdo, firma na 2000 i amplia na 2006 i 2010, Rusia i Merka a bai di akuerdo pa eliminá 34 tòn métriko di plutonio di grado militar.
