Regla situashon finansiero promé ku kasa

Katherine Filesia

Kasamentu ta masha dushi miéntras tur kos ta kana bon. Pero e ta kambia di felisidat pa problema  ora habri for di otro i mester partí propiedat. Aki sinembargo tin e posibilidatnan ku por regla tur kos promé ku kasa òf asta despues ku a kasa. Meskos ku ta regla den un tèstamènt, meskos por regl’e den asuntunan di pareha. Katherine Filesia, Kandidaat Notaris na Hulanda a duna nos un bista di esaki tambe.

Kòrda tin debe tambe

El a bisa ku ta dependé e persona su situashon promé ku e kasa kon e ke regla esaki. Kisas e hende no tin masha bienes pero kisas e ta un empresario. Katherine semper ta konsehá su klientenan pa kasa ku kondishonnan. Tin hende ta pensa ku tòg nan no tin nada ke men no mester di kasa ku kondishon, pero ta lubidá ku tin debe tambe ku e otro pareha tambe tin di karga ora terminá e relashon. Kisas e ta ménos romántiko pero ta bon pa regla kos pa despues finansieramente no haña problema.

Mihó promé ku kasa

Si no a kasa segun e kondishonnan di kasamentu esta ku Huwelijkse Voorwaarden, e ora ei ta lei ta konta si e relashon terminá. Esaki ta nifiká loke ta di mi ta di bo i loke ta di bo ta di mi. I si ke pa esaki ta diferente ta bon pa aserká un notario. E pregunta hopi bia ta bin ku un di e parehanan so ke bai regla e asuntunan serka un notario, pero segun Katherine esei no ta posibel. E ta un kontrakt entre dos hende i tur dos mester wak kiko nan ke i pa firma e akta. E por sosodé promé i despues ku kasa. Mayoria hende ta hasié promé ku kasa pero si bo a  kasa kaba i tòg ke e kondishonnan ei, tambe e ta posibel. Nan komo notario hopi bia ta konsehá pa hasié promé ku kasa sino tin di bai parti mitar mitar te ora yega na e kondishon nobo. Mester parti tur kos i despues di esaki por sera e Huwelijkse Voorwaarden  i p’esei mes ta bon pa hasié promé ku kasa.

Kasa pafó di komunidat di bienes

Huwelijkse Voorwaarden ta un término general pero tin diferente forma mas ku por regla  e kondishonnan entre un pareha. Esun mas komun ta Buitengemeenschap. I den esei tambe tin diferente sous. Tin e “koude uitsluiting” ku ta nifiká ku no ta papia nada di parti kos pero loke ta di mi ta keda di mi promé i despues di kasa i loke ta di bo tambe ta keda di bo. I banda di esei segun Katherine, tin dos kos ku yama Verrekenbedingen ku ta algu masha kompleho. Den gemeenschap van goederen por ehèmpel bo ta parti e kosnan igual pero ora tin e verrekenbedingen, no ta wak e kas riba su mes pero ta wak e balor di esaki i e balor aki ta parti ku otro. E kas ta keda di e pareha ku a drenta e relashon kuné pero ta duna e otro partido mitar di balor di e kas. Por partié tur aña  òf ta warda si kisas na final di e relashon ta duna mitar di e balor di e propiedat.

Kontrakt di biba huntu

Den kaso ku ta biba i no kasa, por regla esei tambe. Por firma un Samenlevens kontrakt i e úniko diferensia ta ku huwelijkse voorwaarden ta mihó regla den lei. E akuerdo di biba huntu aki por keda reglá tambe sin tin mester di bai un notario ounke atrobe segun Katherine e notario ta mihó pa asistí pasobra e por duna konseho kiko si i no. E samenlevens kontrakt ta mas fleksibel pasobra einan por disidí kiko tur ta pone den dje. Den e kontrakt tin di pone ki ora esaki no ta bálido mas. Katherine a bisa ku ta masha importante pa pone den dje.  Por ehèmpel por stipulá den e kontrakt ku si esun pareha no ta na e mesun adrès mas, òf si por proba ku nan a bai for di otro i a  firma ku e relashon a kaba. Mayoria bia ta bon idea pa skibi den e kontrakt ki ora e ta terminá, por ehèmpel si no ta biba mas riba un adrès. Sino por bin problema di interpretashon.

Regla promé kasa

Ta hopi kos tin den bida ku nos por regla pa kosnan por kana mas suave. P’esei Katherine a bisa ku semper e ta trese esaki dilanti ku hopi hende ora ta namorá no ke hasi esakinan i despues por bin problema. Ta mihó regl’e awor, i no warda te ora problema presentá. I serando un kontrakt no ta nifiká ku no ta stima otro mas. Ta simplemente pa regla asuntunan mihó, pasobra bo por kasa namorá pero no sa kiko ta pasa despues. Tin hende ta pensa ku nan no tin nada tòg pero mester tene kuenta ku debe tambe ta konta den e repartishon. Ta bon pa regla situashon finansiero promé ku kasa pasobra un pareha por skonde kos pa otro. Katherine a yega di eksperensiá esei kaminda tin hende ku adikshon di wega di plaka i e otro pareha no tabata sa esaki. I p’esei ta bon pa eksperensia asta si ta namorá i na bida.

Ken ta Katherine Filesia

Katherine Filesia a promové resientemente komo doctor den “Notarieel Recht”, despues di a defendé su PhD tésis éksitosamente na universidat di Leiden. Su tésis tabata titulá: “Speaking the Same Language: De invoering van de Anglo-Amerikaanse trust in het Nederlandse recht”. E investigashon di dr. Filesia ta trata di e figura ‘trust’ ku ta wòrdu usá internashonalmente den e mundu finansiero i kon pa implement’é den e sistema hurídiko hulandes. I Katherine ta na Kòrsou aktualmente kaminda el a partisipá den seminario i tambe lo keda pa algun siman pa mira unda mas e por duna un man. I naturalmente nos di Djasabra semper ta pone atenshon na kosnan positivo i na nos hendenan ku ta alsa nòmber di nos pais.

Eskoho di lei Notarial

Katherine a no a kuminsá studia lei notarial, pero Rechts Geleerdheid. E tabata ke hasi lei internashonal i Oropeo i a bai Leiden. Den su promé aña e kier a sa mas di lei i a bai Rechtwinkel na Leiden. Einan e kier a hasi lei penal pa mira kua e  gusta mas ya ku den prensa ta tende hopi di lei penal. Pero e no a keda skohé pa duna un man den lei penal ounke si nan a aserk’é pa e departamento di ‘personen en familierecht’ i einan el a sera konosí ku lei notarial. Despues banda di su estudio di Recht Geleerdheid el a hasi lei notarial. Asina Katherine a hasi tur dos i ora e mester a skohe, el a mira ku e lei notarial tin di aber ku hende loke a hala su atenshon mas. Na Rechtswinkel e ta topa hende ku ta bin pa divorsio i tambe tèstamènt i esei a yama su atenshon muchu mas. E mester a skohe entre abogado i notario; el a kore stazje na Kòrsou den abogasia i notario i na Hulanda tambe el a kore stazje i asina definitivamente Katherine a skohe pa e lei notarial.

Investigashon di seis aña

Den defensa di su tésis, ku ta despues di un periodo di seis aña, e sa ku e ta sera un kapítulo di su bida. E tabata basta nèrvioso pasobra ora bai defendé bo tésis bo no sa ki pregunta bo ta bai haña. Pa 45 minüt e tin di defendé sin sa kiko pa spera.  Pero una bes e tabata den dje, e mes a skibi su buki i tabata sa tur kos den dje. Na Leiden pa 45 minüt ta sera porta pa defendé i despues un hòmber ku un pedal ta kana drenta i bisa Hora. E ta kontentu ku e por a pasa dor di dje. Te ainda el a haña reakshonnan positivo teniendo na kuenta e tema asina kompliká. Hopi ke lesa e buki i komo el a splika na un manera ku otro no a splik’é nunka, e ta hala atenshon. El a keda aserká hopi for di profeshonalnan na Hulanda mes, ku ke analisá e posibilidat pa introdusié einan tambe.