WASHINGTON, AP.- Den un situashon masha humiante presidente Donald Trump i e lidernan republikano a retirá djabièrnè di e kámara di representante nan inisiativa di lei pa revoká Obamacare , esaki ora a bira evidente ku e medida lo frakasá rotundamente.
Tabata un derota sorprendente pa e mandatario nobo despues ku a eksihí e representantenan republikano pa nan vota ayera pa e medida, ku e menasa di mantené vigente Obamacare i pasa pa otro asuntunan den kaso di ku e votashon frakasá. E inisiativa a keda retirá minüt promé ku e votashon a kuminsá.
E presidente a pèrdè den su pustamentu. Na su lugá Trump kende a hasi kampaña manera un eksperto pa logra akuerdonan i a sigurá ku e por regla e sistema nashonal di seguronan di salú sin yudansa, a mira kon e legisladónan republikano a rechasá su menasa i a laga bon kla ku nan ta duna kuenta i rason na e votadónan kendenan a eligié i no na presidente.
E republikanonan a pasa shete aña hasiendo kampaña kontra di e lei di salú di presidente Barack Obama i a vota un kantidat di biaha pa derotá totalmente òf parsialmente kontra di dje. Pero ora finalmente nan a haña oportunidat pa aprobá un medida pa revoká un inisiativa ku tin posibilidat di keda aprobá, nan no a logra kulminá nan esfuersonan.
No ta bon kla e siguiente paso pero e panorama di otro prioridatnan, manera reforma di e kódigo fiskal awor ta lusi desafiante tambe.
