NEW DELHI, AP.- Un tribunal di India a sentensia un hòmber ku a asesiná un muhé, tirando ásido sulfur riba dje pasó esaki a ninga di kasa kuné tres aña promé.
Ta trata di e promé sanshon di morto apliká pa un atake ku ásido bou di leinan estrikto krea resientemente pa e gobièrnu, esaki ta un intento pa para krímen kontra hende muhé despues ku a violá un muhé riba bùs na New Delhi na 2012.
Fiskalnan a bisa ku un korte di Mumbai a sentensia Ankur Panwar despues di a hañ’é kulpabel di asesiná su bisiña Preeti Rathi di 23 aña. El a muri pa su kemaduranan severo, un luna despues di e atake ku ásido. Esaki a daña su pulmon, kuèrdè vokal i tambe su wowonan.
Outoridatnan a relatá ku Panwar a sigui e víktima na bordo di un trein desde New Delhi, kaminda ámbos tabata biba i a tira ásido riba dje na momentu ku el a baha di trein na Mumbai. E sospechoso a keda detené un aña despues.
Amar Singh Rathi, tata di e víktima, a bisa ku e veredikto lo yuda evitá mas krímen kontra muhé. “Tres aña a pasa, promé ku nos a risibí hustisia, pero mi ta felis ku finalmente esaki a yega”, asina el a bisa.
E furia públiko pa e kaso di violashon na 2012 a generá leinan ku a dupliká sentensianan di prizòn pa violashon na 20 aña. Pero mayoria muhé a bisa ku e abusunan ta kontinuá i ku e leinan nobo no a hasi e kayanan mas safe.
