WILLEMSTAD – Trahadónan di Selikor a lanta awe mainta i pone trabou abou i blòkia e kaya ku ta keda dirigí pa OW i Selikor. E presidente di sindikato BTG, sr. Frensel Silië ku ta representá e trahadónan di Selikor a indiká ku tin mal kontentu ku desishon di gerensia pa no prolongá kontrakt di trahadónan di ‘uitzendbureau’. Algun di e trahadónan aki tin kuater aña kaba trahando i un otro grupo grandi tres aña. Awor a kuminsá informá nan ku nan lo tin ku bai kas i despues di un pa dos luna lo tuma nan bek na trabou.
Silië ta splika ku e problema ta ku e trahadónan aki a akapará sufisiente eksperensia durante e kantidat di tempu ku nan ta aki i sindikato no ta mira e motibu pakiko no ta tuma nan awor aki den servisio permanente. Aña pasa durante e mesun periodo aki tambe trahadónan di Selikor a akshoná i e punto aki a bin dilanti. E dia ei gerensia lo a bai hasi un análisis pa wak kuantu vakatura tin i a Sali na kla ku e departamento spesífiko aki falta 16 trahadó. A krea e speransa kue grupo aki lo drenta servisio fiho na momentu ku a bisa nan bai buska nan karta di bon kondukta. “Ayera a informá nan ku no ta bai duna nan un kontrakt permanente,” asina Silië a sigui bisa. E sindikato ta haña ku e trahadónan aki mester haña un kontrakt permanente i no tin niun motibu pakiko no por tuma nan den servisio fiho. A komprondé tambe ku sigur dos di e trahadónan tin 4 aña trahando pa Selikor kaba pero esei nan tin ku bai konfirmá ku gerensia. For di 2020 un grupo grandi a tuma oferta bai i tambe tabatin traslado di trahadó di un departamento pa otro i tambe trahadónan kua tuma retiru i bai biba den eksterior. “Nos no ta mira niun motibu pakiko no por tuma esaki nan den servisio fiho. Lokual ta eksihí ta pa tuma e trahadónan aki ku ta bon prepará pa e trabou. Nan ta traha tur dia i ta yuda e departamento pa duna e servisio pa rekohé sushi di kas pa asina por kaba e rutanan apesar di tur kos ku por pasa ku ekiponan i kaba e trabou pa djabièrnè. Awor ta bin trata e trahadónan di e forma aki. No por bin bisa tampoko ku nan evaluashon ta malu ya ku nan tin tres aña ta trahando kaba.” Sindikato i gerensia lo sinta pa wak awor kon por yega na un solushon pa wèlga aki ku a paralisá Selikor awe mainta i ku tin e kaya ku ta dirigí pa OW i ‘Keuringslokaal’ tambe sera. Polis ta na e sitio pa dirigí tráfiko.
