ETIOPIA, AP.- E informashon preliminar di e grabadó di dato di e buelo di un avion di Ethiopian Airlines den kual 157 persona a muri un siman pasa ta mustra similaridat bon kla ku un desaster anterior na Indonesia ku e mesun tipo di avion, asina e minister di transporte di Etiopia a bisa.
E anunsio a keda duná miéntras míles di persona tabata marcha pa e kapital di Adis Abeba pa kompaña e kahanan di morto bashí i kubrí ku bandera nashonal pa un entiero na honor di e víktimanan di Etiopia. E kahanan di morto tabata bashí pasobra outoridatnan a bisa ku e proseso di rekuperashon di e identifikashon di e restunan ta bai tuma basta luna. Algun di e famianan a kai flou.
E choke di e buelo 302 di Ethiopian dia 10 di mart i esun di un avion di Lion Air na Indonesia na òktober, tur dos ku un Boeing 737 Max8 a sòru ku Merka i diferente otro pais a prohibí e vuelonan di e tipo di avion ei.
E grabashonnan di e buelo 302 ku a kai poko despues di a lansa na Adis Abeba rumbo pa Nairobi a keda rekuperá den un kondishon loke lo permití pa saka kasi tur dato di e parti paden, asina Dagmawit Moges minister di transporte a bisa na reporteronan.
E informashon rekuperá te ku awor di e grabado di dato ta indiká similaridat kla entre e dos chokenan, asina el a sigui bisa. Tantu e grabadó di dato komo e bos di kabina di pilot a keda mandá pa keda analisá pa e agensia di investigashon di aksidente aéreo BEA. Moges no a duna detaye riba kual e similaridat ta konkluí.
E atministrashon federal di aviashon di Merka FAA a bisa ku e datonan ku nan a saka for di satélite ta mustra ku den e último movementunan di e buelo 302 di Ethiopian Airlines tabata meskos ku e buelo 610 di Indonesia Lion Air ku a kai den laman di Java na òktober ku 189 persona na bordo.
