Minister Cooper Cijntje a firma akuerdo ku Sürnam awe mainta
WILLEMSTAD.-Un delegashon di Sürnam ta na Kòrsou, konsistiendo di mandatario i dirigentenan di e kompania di aviashon SLM i aki a firma un akuerdo ku gobièrnu di Kòrsou den persona di ministernan Cooper di VVRP i tambe Cijntje di Desaroyo Ekonómiko.
Minister Ruisandro Cijntje a yama e bishitantenan bon bini na Kòrsou i tambe danki di a hasi posibel ku e dos paisnan aki por fortifiká e lasonan di aviashon i tambe ekonómiko pasobra aparte di tráfiko aéreo tin e posibilidatnan di hasi negoshi ku ta habri entre e dos paisnan.
Tin vários kombersashon ta tumando lugá pa logra mas i mihó koperashon entre e paisnan ku e meta pa logra un region di Karibe muchu mas fuerte.
Minister Cooper na su turno a duna di konosé ku e ruta Kòrsou -Miami ta unu hopi gusta pa yunan di Kòrsou. El a enfatisá serka SLM ku e loke ku hendenan lokal mester paga pa bai Miami ta apsurdo haltu i e ta spera ku SLM lo tene e preisnan na kuenta pa pueblo di Kòrsou por haña konekshon pagabel.
SLM ta kuminsá bula entre Kòrsou i Miami 3x pa siman, riba djaluna, djarason i djabièrnè. Lo sali Paramaribo, bula pa Aruba, kaba Kòrsou i yega Miami.
