OKLAHOMA, AP.- Un temblor fuerte na Oklahoma a pone ku mester a sera 37 pos di eliminashon di awa sushi na parti sentral i nort di e siudat. Akinan ta kaminda djasabra tabatin e temblor di magnitut 5,6.
Ta eksistí mas òf ménos 4200 pos den henter e siudat i mas òf ménos 700 den un área di interes di 38.850 kilometer kuadrá kreá pa e komishon ku ta enkargá ku e investigashon di temblor den e zona i kual área ta inkluí e episentro di e temblor serka di Pawnee.
E temblor aki a empatá esun na novèmber 2011 komo esun mas fuerte den historia di estado i inklusive a sintié den Nebraska pero no a informá di niun daño grandi. No tur e posnan di e estado ta traha simultáneamente, asina Matt Skinner bosero di Oklahoma Corporation Commission a bisa. E oumento di grandura di e temblornan riba 3,0 na Oklahoma ta debí na e eliminashon di awa sushi bou di tera di e produkshon di petroli i gas natural i for di 2013 e komishon a ordená e propietarionan di e posnan di awa sushi pa nan redusí nan volúmen di eliminashon prinsipalmente den e partinan di e siudat kaminda temblor por ta mas fuerte.
