LISBOA, PORTUGAL, AP.- Un trein di pasahero a sali di riel djabièrnè na Galicia, provokando morto di kuater persona, entre nan un turista merikano, segun informashon di outoridatnan.
E aksidente a tuma lugá 9’or di mainta i a laga 48 persona heridá. Nan a wòrdu trasladá pa hospitalnan di e region na nortwèst di Spaña.
E trein a sali di riel yegando stashon di Porino, 450 kilometer na nortwèst di Madrid. Asina gobièrnu regional a indiká.
E konvoi, un mashin i tres wagòn, ta biaha entre Spaña i Portugal. Esaki ta pertenesé na e empresa di riel portugues Camboios di Portugal.
E presidente di e gobièrnu regional, Alberto Nunes Feijo, a bisa na periodistanan na e sitio ku e makinista i rekolektor di ticket a muri. Dos pasahero mas tambe a muri.
Un di e pasaheronan tabata un turista merikano ku a muri den e trein, segun un funshonario di gobièrnu regional ku a papia ku kondishon pa keda anónimo debí ku e no tabata outorisá pa identifiká ku su nòmber. El a agregá ku e no tin mas detaye riba e víktima.
Un otro hòmber di e lokalidat, di 23 aña di edat, a muri den hospital, segun gobièrnu regional a indiká den un komunikado.
E teksto a indiká ku 27 pasahero heridá tabata risibiendo atenshon di emergensia mas atardi. Mayoria di esnan heridá tabata spañó i portugues, pero tambe tabatin persona di Merka, Alemania i Latinoamérika. E komunikado no a duna mas detaye.
