SANA, YEMEN, AP.- E sifra di mortonan riba e terser dia di konfrontashon entre rebeldenan shiita huti i un koalishon ku e gobièrnu di Yemen ta respaldá, pa e kòntròl di e siudat di Hodeida, a oumentá djabièrnè na por lo ménos 280, segun kalkulashonnan di funshonarionan.
E koalishon saudi-emirato a bombardiá posishonnan huti djabièrnè, miéntras ku e rebeldenan a bisa den un komunikado ku a tira un misil kontra forsanan pro-gubernamental, pero no a indiká si tabatin morto òf no.
Hodeida ta e haf prinsipal pa entrada di kuminda i yudansa humanitario den un pais ku ta pasando dor di hamber entre e pueblo.
Funshonarionan di Yemen a bisa ku desena di kombatiente pro-gubernamental a muri desde komienso di e asalto kontra e siudat djárason. Di e banda rebelde, tabatin kadaver di kombatientenan huti. Funshonarionan a kalkulá e sifra di morto na 280.
Funshonarionan kastrense a bisa ku ta preparando pa un ofensiva final pa tuma kòntròl di e aeropuerto di Hodeida i ku e konfrontashonnan riba tera a disminuí pa djabièrnè anochi. E funshonarionan a bisa ku e atake kontra e aeropuerto lo pasa awe mainta.
Komandantenan militar a bisa ku e operashon lo wòrdu kompliká pasó e ophetivo ta pa protehá e aeropuerto i e avionnan serka. E hutinan lo usa frankotiradónan i minanan terestre pa retrasá su avanse.
