MIAMI, AP.- E brote di Zika den e distrito artístiko Wynwood na Miami a konsentrá den tres negoshi ku zonanan den aire liber, kompartí pa empleadonan, klientenan i sangura den reprodukshon i e kantidat di personanan infektá kisas ta asta muchu, mas ku loke tin reportá, asina un informe di un investigashon di e sentro di salú pa kontrol i prevenshon di enfermedatnan di Merka CDC a indiká.
E brote, esun promé den un teritorio kontinental di Merka, ta persistí pa mas di un luna pero a keda mantené den un zona geográfiko chikí, hopi similar na e brotenan anterior di otro vírusnan ku sangura ta trese kuné na Florida.
Poko mas ku dos siman despues ku a kuminsá e fumigashon den Wynwood, no a reportá mas infekshon di Zika den e bisindario.
En partikular e flitmentu a yuda pa frena e infekshonnan.
Un kantidat di 29 kaso a keda vinkulá na tres negoshi den un área di seis blòk ku empleadonan ku tabata traha i a tuma pouze den aire liber, serka di e awa i sitionan di reprodukshon di sangura, di akuerdo ku e reportahe redaktá prinsipalmente pa e epidemiólogo di gobièrnu Ana Likos i otro integrantenan di e departamento di salú estatal.
E repor tahe no ta identifiká ni deskribí e negoshinan. E área di kuminda di aire liber i e zona di entretenimentu di Wynwood Yard a rekonosé ku tres di nan 65 empleadonan a duna positivo na Zika pero fundadó di e lugá no kier a atmití esaki ayera.
