WASHINGTON, AP.- E Konvenshonnan polítiko a wòrdu venená ku historia di spionahe internashonal. Awor ta e momentu pa kuminsá e trabou ofisial di spionahe di e kampaña presidensial.
E siman aki, Donald Trump i Hillary Clinton lo kuminsá risibí informenan di inte l igensia ultra sekretu di ofisina di e direktor nashonal di inteligensia. Pero e aña aki, e tradishon di mas di 60 aña di proporshoná informashon klasifiká na e kandidatonan presidensial a kousa krítikanan skèrpi entre demókratanan i republikanonan tokante si e kandidato di e otro partido por warda un sekreto.
Partidarionan di Clinton i algun outoridat di inteligensia ta bisa ku e magnate di New York tin un boka muchu grandi i ku frekuensia e ta implosivo.
E partidarionan di Trump ta reklamá e uso di un server priva di e e-mail di Clinton pa su maneho deskuidá di informashon klasifiká na momentu ku e tabata sekretaria di Estado.
Den un karta dirigí pa e direktor di Inteligensia Nashonal, James Clapper, e presidente di Kámara di Representante, Paul Ryan, a bisa ku ainda tin vários interogante relashoná ku e maneho di e-mail di Clinton i a pidi pa e no keda proporshoná ku informashonnan klasifiká den e sobra tempu di su kampaña. Clapper a rechasá e petishon i a bisa “mi no ta pretendé di tene informenan di ningun kandidato ofisialmente nominá.
Komo sekretaria di Estado, Clinton tabatin outorisashon pa risibí informashon klasifiká i tabata risibí un kopia di e informe diario di e presidente, e dokumento di inteligensia di nivel mas haltu di Merka, kual ta inkluí inteligensia spesífiko i análisis di diferente parti di mundu. Trump, kende ku trayektoria di empresario, nunka e no tabatin outorisashon di seguridat gubernamental i ta un nobato pa loke ta trata informenan sekretu.
Trump tin muchu ménos eksperensia den asuntunan internashonal ku Clinton. El a sugerí pa Merka bandoná su tratadonan ku aliadonan di OTAN ku no a kumpli ku pago i a ekspresá su atmirashon pa presidente Vladimir Putin.
