PARIS, AP.- E empleadonan di toren Eiffel ta welgando desde djárason, kontra e polítika nobo di akseso turístiko na e atrakshon. E reglanan nobo ta responsabel pa reinan demasiado largu.
E speransa di turistanan pa subi e monumento parisino a wòrdu frustrá djaweps, den temporada kaminda e fluho di bishitantenan na e monumento ta super haltu, debí ku ta fakansi di zomer.
E turista aleman Nico Schulze Bilk, kende a plania su biahe pa Paris ocho luna pasá a ekspresá su frustrashon.
“Esaki ta mi promé biaha na Paris i mi tabata emoshoná pa mira e toren Eiffel i e siudat desde ariba, pero e ta será”, asina el a bisa. “Mi ta hopi rabiá”.
Caroline Brawand, kende a bishitá e siudat ku su famia desde Suisa, a plania pa kompartí e bista mágiko aki pa promé biaha ku su yu muhé.
“Nos ta hopi desepshoná, pasó nos a reservá for di un luna pasá pa subi e último piso di e toren Eiffel”, asina el a bisa. “Pero nos ta komprondé e empleadonan ku a splika e situashon di rei largu”.
Desde luna pasá, Eiffel Tower a oumentá su kantidat di benta di ticket ku a wòrdu reservá ku antisipashon pa bishitantenan.
Sinembargo, e sindikatonan ku ta representá e 300 empleadonan di e toren ta keha ku esaki a kousa pa reinan monstruoso i ku gerensia no a skucha su preokupashonnan. Ticketnan reservá ta asigná kada bishitante e orario ku esaki por bishitá e Toren, kontrali na ticketnan bendé na e monumento mes kual no ta mará na un orario fiho.
