ISTANBUL, TURKIA, AP.- Estado di emergensia na Turkia, deklará tres luna pasá despues di un gòlpi militar frakasá, a wòrdu ampliá pa tres luna mas. Asina vise-promé minister Numan Kurtulmus a informá.
Den deklarashonnan na prensa despues di un reunion semanal di gabinete, Kurtulmus a agregá ku e estado spesial lo ekstendé pa 90 dia mas desde 19 di òktober. E medida a wòrdu anunsiá miéntras gobièrnu ta sigui ku un ofensivo masivo kontra un movementu dirigí pa klérigo Fetullah Gulen, kende ta biba den Merka.
E estado di emergensia a permití gobièrnu pa goberná atraves di dekretonan, normalmente sin pasa via parlamento, i fasilitá e represhon di outoridatnan di movementu Gulen, akusá di orkestrá e gòlpi di estado.
Te ainda, Turkia detené kasi 32.000 persona relashoná ku e gòlpi i a retirá òf suspendé míles di trahadónan den gobièrnu, inkluyendo polis, ehérsito i poder hudisial. Sinembargo, e partido prinsipal di oposishon di Turkia i gruponan defensor di derechonan humano a akusá gobièrnu di abusá di podernan di emergensia pa reprimí otro bosnan disidente, no solamente e movementu di Gulen. Siman pasá, outoridatnan a sera por lo ménos 12 stashon di televishon kurdo pa supuesto menasanan di seguridat nashonal. Entre esaki, tabatin un stashon ku tabata transmití animashon pa mucha den lenguahe kurdo.
