CHARLOTTE, AP.- E video di e enkuentro entre polisnan di Charlotte i un hòmber koló skur ta mustra su kasá sklamando repetidamente ku e no ta armá i pidiendo e polisnan pa nan no tir’é, miéntras e polisnan tabata grita e hòmber pa e laga e arma bai.
E video, grabá pa e kasá di Keith Lamont i publiká ayera via di New York Times no ta mustra bon kla si Scott ta armá òf no. Polis ta bisa ku e hòmber tabata armá pero testigunan ta afirmá ku e tabatin un buki den su man. E video di mas òf ménos 2 minüt i mei no ta mustra e momentu di e tirunan ounke por skucha esakinan si.
E video ta mustra e kasá splikando polis ku Scott tin un problema selebral debí na un trouma ku el a yega di sufri. Dado momentu bo ta tende pidi su kasá pa e sali for di outo pa asina polisnan no kibra e glas di outo. El a bisa “no hasi”, ounke no ta bon kla na kiko e tabata referí.
Na momentu ku e interkambio di gritu tabata intensifiká e muhé tabata sklama “Mihó bosnan no tir’é”, i por a skucha tiru i por a mira Scott boka abou riba asera.
E kasá a sigui graba miéntras e ta puntra e polisnan si nan a yama ambulans.
E señora ta bisa e ubikashon geográfiko kaminda nan ta i ta apuntá e kámara riba e polisnan i ta bisa “esaki ta esnan ku a tira mi kasá”.
