WILLEMSTAD.- Organisashon di WOW Music Festival 2023 awe mèrdia a duna di konosé na EXTRA ku rèper Rich Kalashh lo no toka riba e festival. Marloes Vis, na nòmber di WOW Music Festival 2023 ta splika ku e festival ‘ta bai dor gewon’. EXTRA awe mainta a skirbi ku Rich Kalashh no a haña pèrmit pa presentá na Kòrsou.
E organisashon no ta duna detaye tokante esaki. “Nos ke konfirmá ku Rich Kalashh lo no toka na WOW Music Festival, pero ku e festival ta bai dor normal.” Artista nobo riba e lista ta e konosido rèper Dongo. Otro artistanan ku tabata konfirmá kaba ta Dopebwoy, Poke, Idaly, Alex Sargo i Don Duro. E festival lo tuma lugá djabièrnè 6 di yanüari na Parasassa.
