EDINBURG, TEXAS, MERKA, AP.- Un total di 17 inmigrante, ku a sali di Mexico, Hondúras i otro paisnan a wòrdu deskubrí sera den un trailer di un trùk, 30 kilometer di frontera ku Mexico. E personanan aki, posiblemente a pasa por lo ménos ocho ora será den e trùk promé ku nan a wòrdu liberá pa outoridat djadumingu. Asina e suphefe di polis di Edinburg, Oscar Trevino, a indiká den deklarashonnan na televishon.
Ningun di e personanan aki tabatin mester di asistensia médiko, un hòmber i un muhé, di nashonalidat kubano, tabata na enkargo di e trùk a wòrdu detené.
Polis di Edinburg a akudí na e sitio despues di haña un yamada anónimo di un hende ku a bisa ku un famia di dje tabata pegá ku otro personanan den e trailer. Asina e televishon a bisa.
E agentenan a kuminsá bati riba kada un di e trùknan stashoná i na final nan a skucha algun hende gritando den esakinan, segun indikashon di polis.
Servisio di Kòntròl di Inmigrashon i Duana di Merka ta investigando e kaso, segun informashon di un bosero di e agensia.
E deskubrimentu a pasa mas di tres siman despues ku mas di 10 persona a muri i vários mas a wòrdu reskatá di un trailer dilanti un tienda di WalMart na San Antonio meimei di un kalor intenso. Mas di desena di e personanan reskatá a wòrdu hospitalisá. E shofùr di e trùk a wòrdu detené pa outoridat federal, akusá di transporte ilegal di inmigrante.
