MATAMOROS, MEXICO, AP.- Un krísis humanitario ta keda empeorá segun dianan ta pasa riba kampamentu di Matamoros, na otro banda di Brownsville, Texas. Mas o ménos 2000 migrante ta wardando pa paresé dilanti di hues, meimei di kondishonnan médiko i sanitario ku ta deteriorá tur dia di nobo.
E kampamentu ta produkto di e polítika di gobièrnu merikano di Donald Trump, kual ta obligá e migrantenan pa pidi asilo na Merka i warda na México, miéntras ku nan solisitut ta wòrdu prosesá. Mas di 55.000 persona, ta bibando den e situashon aki.
Awa limpi ta skars i algun persona ta baña i laba nan paña den riu Bravo, sabiendo ku esaki ta kontaminá ku E.Coli i otro bakterianan. E migrantenan ta dependé di kontribuidónan pa haña kuminda òf ta piska den riu i ta kushiná loke nan saka for di esaki.
E kondishon di e kampamentu ta reflehá e peligernan pa salú asosiá ku e polítika di Trump, kual ta pa e migrantenan warda na México. Diferente organisashon ta debatí pa ofresé yudansa médiko i otro servisionan básiko sin sosten di e gobièrnunan merikano i mehikano.
