TOKYO, AP.- E embahada di Merka na Hapon a bisa ku e merikanonan na bordo di un krusero den karentena lo wòrdu repatriá djadumingu.
E barku Diamond Princess ta ankrá na Yokohama, un siudat na sùitwèst di Tokyo i tin 380 merikano na bordo. Te ainda, 285 pasahero di e krusero a tèst positivo pa e vírus nobo i a konfirmá 67 kaso nobo djasabra.
E personanan repatriá lo wòrdu trasladá pa Base Travis di Forsa Aéreo na California, ounke algun lo wòrdu trasladá pa Texas, segun indikashon di un karta di embahada na pasaheronan i tripulashon riba internèt.
Ora e merikanonan yega Merka, nan lo mester bolbe keda dos siman den karentena, asina e karta a agregá. Tur mester hasi un chekeo médiko promé ku drenta e avion i esnan ku mustra síntoma di e enfermedat lo no por biaha.
E kara na e merikanonan di Diamond Princess a atvertí ku esnan ku “disidí pa no regresá den e buelo charter aki lo no por regresá Merka durante un temporada no definí”.
