SAO PAULO, BRASIL, AFP.- E gobernador di São Paulo, Joao Doria, a prolongá e karentena te ku 31 di mei debí na e krísis di Coronavirus. E medida ta ignorá preshon di presidente Jair Bolsonaro, kende ta kontra e ‘lockdown’.
E estado mas riku i pobla di Brasil, ku 45,9 mion habitante, ta episentro di e pandemia den e pais ku kasi un terser di 135.106 kaso i 9.146 morto registrá te ku djaweps.
E karentena parsial a inisiá riba 24 di mart i te ku ayera e gobièrnu a plania pa anunsiá e kondishonnan pa inisiá un programa di suavisashon di medida i rekuperashon ekonómiko desde djaluna awor.
Pero e gobièrnu a opta a prolongá esaki, debí ku e karentena no a wòrdu respetá kompletamente den e último dianan ku a pasa, loke a oumentá e kantidat di infekshon di COVID-19.
Ounke e no ta deskartá un ‘lockdown’ kompleto si esaki ta nesesario, Doria no a determiná medidanan di restrikshon mas estrikto.
Tur negoshi konsiderá komo esensial ta funshonando na São Paulo, meskos ku algun aktividat industrial i ounke e rekomendashon ta pa keda kas ounke esaki no ta obligatorio.