SALT LAKE CITY, UTAH, MERKA, AP.- E miembresia di un grupo na fabor di arma di e komunidat LGBT a oumentá mas ku dòbel, for di momentu ku un hòmber a masakrá 49 persona den un klup ‘gay’ na Florida.
E presidente sukursal di Pink Pistols na Utah, Matt Schlentz, a bisa ku e miembresia di e grupo Pink Pistols a oumentá ku mas di 1.500 pa 4.000, for di e atake di 12 di yüni hasí pa Omar Mateen na Orlando. Asina e korant The Salt Lake Tribune a indiká.
” Ta realmente tristu ku algu asina mester a pasa pa hende realisá ku esaki ta un nesesidat pa nos komunidat”, asina Schlentz a bisa. “Pero e realidat ta ku ainda nos ta ataká pa motibu ku nos a sunchi nos parehanan òf tene man den públiko”.
Schlentz tin armanan semioutomátiko similar na e Sig Sauer MCX, usá pa Mateen i a bisa ku e hendenan ta reakshoná diferente na momentu ku nan haña sa ku e ta defendé derechi di karga arma.
“Opviamente, komo ‘gay’ mi tin opinionnan liberal sosialmente. Pero pa loke ta e punto aki, mi tin opinionnan hopi konservador.
E realidat ta manera e ta: mundu ta un lugá violento, teribel, ku ta duna miedu i hende ta deseá bu malu basá riba e persona ku bo ta stima”.
Pink Pistols tabata krea na aña 2000, komo kontesta di un seri di insidente violento, manera e asesinato di e studiante ‘gay’ Matthew Shepard na Wyoming.
