BOGOTA, COLOMBIA, AFP.- Un eksploshon na un mina di karbon den sentro di Colombia a laga 21 morto despues ku a haña 10 kadaver, segun indikashon di e presidente Gustavo Petro.
“Lamentablemente, 21 persona a pèrdè nan bida den e aksidente trágiko aki na Sutatausa”, un siudat di departamento di Cundinamarca, asina e mandatario kolombiano a publiká riba Twitter.
Un akumulashon di gas metano a kousa e eksploshon djamars anochi den un parti bou di tera segun funshonarionan lokal.
Ekiponan di reskate a haña 11 kadaver den e mina djárason, ku ta keda 75 kilometer na nort di Bogotá.
E gobernador di Cundinamarka, Nicolas Garcias, a anunsiá ku e búskeda a kaba djaweps i ku “lamentablemente ya no tin niun hende mas na bida”.
Ekiponan di reskate a buska e mineronan den seis mina legal konektá kaminda funshonarionan ta investigando si e fluho di aire tabata adekuá.
Jaime Arevalo, alkalde di Sutatausa a bisa na Blu radio ku a suspendé e lisensia di operashon di e empresa ku ta manehá e mina, Minminer miéntras ku ta investigá e suseso.