BUCHAREST, RUMANIA, AP.- E krísis polítiko na Rumania a profundisá djabièrnè debí ku dos aliado klave di gobièrnu a bisa ku un dekreto di emergensia ku ta suavisá e lei antikorpushon ta inkonstitushonal.
E òrdu, aprobá djárason, ta purba pa deskriminalisá kasonan di korupshon ku ta ménos di 47.800 dòler.
Victor Ciorbea, kende a respaldá e medida a revertí su posishon djabièrnè. El a indiká ku e lo bisa Tribunal Konstitushonal ku e dekreto “no a wòrdu hustifiká” i ku e medida ta krea riesgo di laga “e atministrashon públiko kasi kompletu for di alkanse di e lei”.
E Union di Demókratanan Húngaro, un partido ku ta respaldá gobièrnu formalmente, tambe a kritiká e òrdu. El a bisa ku e lei penal no mester wòrdu modifiká pa dekretonan di emergensia, pero atraves di debatenan parlamentario.
E iglesia òrtodòks Rumano a bisa djabièrnè ku e lucha kontra korupshon mester sigui i ku esnan kulpabel mester wòrdu sanshoná. E robo i desfalko ta degradá material i e sosiedat moralmente.
Minister di Hustisia, Florin Iordache a manifestá su respaldo na e lei. Tribunal lo tuma un desishon tokante legalidat di e dekreto djamars.