PHILADELPHIA, AP.- Kongresistanan i aktivistanan hispániko asistente di e Konvenshon Demókrata a pidi tur latino pa vota i logra un poder mas grandi pa para e kandidato republikano Donald Trump, inkluyendo deportashonnan. Algun a tilda esaki komo un “mancha” ku lo keda pa semper den legasia di Barack Obama.
“Desafortunadamente, nos a mira mas deportashon bou di su atministrashon ku den presidentenan anterior kombiná”, asina Janet Murguia a bisa, kende ta presidente di Konseho Nashonal di Rasa, despues di un foro nashonal di aktivista na Philadelphia, kaminda e konvenshon ta tuma lugá e dianan aki.
“Pues nos mester wak kiko historiadornan ta bisa, pero pa nos, presidente Obama tabatin aspektonan positivo i negativo, i den pió di e kasonan, e nivel históriko di deportashon lo keda komo un mancha pa semper den nos bista”, segun Murguia, un aktivista den komunidat hispániko ku a batisá Obama komo “e hefe di deportashon”.
Trump a promové e kreashon di un muraya na frontera entre México i Merka pa para inmigrashon ilegal.
E kandidato a pone mayoria rabia, spesialmente hispanikonan despues ku el a kalifiká e mehikanonan komo violadó i delinkuentenan ku ta trese droga den Merka.
Sinembargo, e gobièrnu demókrata di Obama a deportá mas di 2,4 mion persona, loke ta representá kasi e mesun sifra total di esnan ekspulsá durante esun di su predesesornan.
