Update: Un bushi a haña e kurpa sin bida di e hóben na Spaanse Water
Wardakosta ta informa ku nan tambe a partisipá na e búskeda ku a kontinuá awe mainta tempran, pa e hóben ku a kai na awa den área di Spaanse Water. Unidatnan di Wardakosta (dos boto), polis, CITRO i tambe sambuyadónan tabata presente. Un sambuyadó, a haña e kurpa sin bida den área di Spaanse Water. A entregá e kurpa na personal di CITRO i Wardakosta i seguidamente a entregá e kurpa na Kuerpo Polisial. E kurpa sin bida ta di un mucha hòmber menor di edat. Forsa na famia i pas na su alma.
A lokalisá kurpa di hóben ku a kai na awa den Spaanse Water
WILEMSTAD.-Informashon ku EXTRA ta dispone di dje ta indiká ku un ratu pasa a lokalisá e kurpa di e hóben ku a kai na awa ayera tardi lat den Spaanse Water. Bosero polisial a indiká ku awor ta bai formalisá esaki. Manera EXTRA a informa den edishon di awe mainta, un aksidente serio a tuma lugá riba laman den e área menshoná.
Ta asina ku e informashon preliminar ta indiká ku dos boto a dal den otro i komo konsekuensia di esaki un hóben a kai na awa. Te den oranan lat di anochi a keda buska pero no a logra lokalis’é. Wardakosta tambe a informa ku a bira asina suku ku a bira imposibel pa mira nada.
E hóben, un mucha hòmber di 16 aña di edat a keda pèrdí, pero manera indiká awe mainta a logra lokalisá e kurpa. Polis ta na e sitio pa kaba di atendé e kaso aki. Asina tin mas detaye EXTRA lo trese esaki.
